意盃4強首回合羅馬國米做「細」界

猪拉多纳

今晚意大利盃4強首回合，狀態低沉嘅羅馬喺主場迎戰深受傷兵潮困擾嘅國際米蘭，雙方都冇必勝把握，戰術必定以穩陣為先，既然大細中位數調升到3.5球，1.68倍入球細當然博得過。（now633及660台周四凌晨3:45直播）
雌狼殘陣 藍黑軍雙箭打柴

羅馬喺歇冬後由「雌狼」變「廢狼」，冇場好波，意甲先後輸畀拿玻里同卡坦尼亞，意盃8強對費倫又要苦戰到加時先贏1:0晉級，中場泰迪同後衞杜杜雙雙被逐，今場要坐波監，殘陣出戰想反彈都難。最重要係早兩日喺聯賽，羅馬先同國米合演「意盃4強預演」，最終雙方踢成1:1，連個主場5連勝紀錄都斷埋纜，見到班波咁沉，相信主帥薛文就算係「進攻大師」，今晚都會以唔輸作客入球為大前提，唔敢搶攻。

另邊廂嘅國米主場標青、作客得人驚，開季爆出一段作客10連勝後，狀態直線下滑整番個5連敗，日前對羅馬拎番1分先叫做止血。最弊「藍黑軍」除咗有卡斯辛奴同迪亞高米列圖一對箭頭打柴，守將森美爾亦繼續養傷，反正次回合由1月30號改到去4月中先踢，今晚作客首回合，當然係穩打穩紮啦，咁嘅環境，大細中位數仲要去到3.5球，唔買細都對唔住自己啦！