祖記回勇拉唔住

猪拉多纳

聯賽大勝加操搶意盃

意大利盃四強首回合，祖雲達斯主場對拉素。歇冬之後祖雲達斯表現唔多理想，但「斑馬兵團」好快重拾王者霸氣，上輪聯賽以4比0大破烏甸尼斯，新星保羅普巴更射入兩球世界波，勇態勒都勒唔住。今次繼續主場作賽，相信祖記有力挫敗拉素，2.32倍嘅「讓球主勝」可捧。

（now 633及660周三凌晨3時45分直播）

祖雲達斯去季以不敗姿態贏得聯賽冠軍，美中不足就係意盃決賽輸畀拿玻里，未能成為雙料冠軍，今季祖記捲土重來當然希望捧走獎盃。其實自1995年後祖記未贏過意大利盃，無論高層及球迷對於是項錦標存有飢渴感，故今場四強戰肯定會拚盡，唔使擔心祖記會喺盃賽留力。
拉素缺高路斯

據悉「斑馬兵」為好好準備今場比賽，大勝烏甸尼斯後，教練干地未有安排球員休息，周日早上要冒住大雪進行操練，唔講仲以為周中要踢歐聯。祖記賽前動態積極，戰意成球隊最大爭勝本錢。

拉素當然唔係善男信女，不過今場缺少受傷嘅前鋒猛將高路斯，戰鬥力肯定打折扣。其實拉素陣中具級數前鋒唔多，就連富於經驗嘅洛基都已經轉投國際米蘭，今場惟有用上費路卡利攻堅。其實費路卡利踢咗咁多年都畀人借來借去，質素當然唔係高路斯嗰皮，今次要攻破祖雲達斯大門有難度。拉素剛於聯賽作客弱隊巴勒莫仲幾乎輸波，似乎作客對佢哋影響都幾大。

另外，意大利盃四強賽制與之前有唔同，四強係採取主客兩回合制，入球數字相同就計算作客入球，仍然打和就於次回合法定時間後加時30分鐘。要留意加時亦計作客入球優惠，再和就要以互射十二碼去分高低。
拉素4年冇贏過祖記

雙方對上一次於意盃碰頭為08/09球季，當時亦係四強階段，拉素主、客兩回合俱以2比1擊敗祖雲達斯，總比數以4比2淘汰對手，並在決賽以互射十二碼擊敗森多利亞取得冠軍。不過自此之後，拉素於聯賽八鬥祖記都贏唔到，只得兩和六負。
近五季交手成績

12/13 祖和 0:0

11/12 祖勝 2:1

拉負 0:1

10/11 拉負 0:1

祖勝 2:1

09/10 祖和 1:1

拉負 0:2

08/09 祖勝 2:0

祖負 1:2*

拉勝 2:1*

拉和 1:1

註：前者主場，*為意大利盃賽事，其餘為聯賽