「聖人」迷失捧愛華頓

猪拉多纳

突換教頭得罪Fans損軍心

真係無喇喇，整撻瘌！近況回勇、逐漸逃離護級區嘅修咸頓，上周中管理層突然宣布辭退功勳領隊艾堅斯，改由全冇英超經驗嘅阿根廷籍普捷天奴揸旗，今次決定唔止得罪球迷，仲影響埋軍心。今晚主場對住要搶分爭踢歐聯嘅愛華頓，力奇撐硬拖肥糖好好教訓呢個迷失「聖人」，作客讓平半要1.77倍上盤。

（有線200及300、廣東體育周二凌晨4:00直播）

冇錯，今季回升英超嘅修咸頓上半季表現有多少令人失望，特別係開季10場就輸咗8場，只係球隊喺艾堅斯領導下逐漸重返正軌，近12場聯賽僅負2場，其中上輪聯賽對住勁旅車仔，仲要係落後兩球都追得番和2:2，班波士氣同鬥志都一流，仲要超出護級區3分，依家無端端走去換領隊，為乜？「聖人」Fans得出一個結論：球會癲咗！
費Sir 莫耶斯齊撐艾堅斯

要知道艾堅斯無論喺「聖人」球員同球迷心目中，都係大受歡迎同支持，球隊喺09年搞到要清盤重組，就係靠艾帥帶住佢哋對上連續兩季由英甲升上英冠，然後再升上英超。艾堅斯對班波熟悉程度，根本無人能及，點知球會主席唔知邊度痕，突然決定換帥，家陣全城包括名帥費格遜同莫耶斯都加入炮轟行列，你話對班波冇影響搵鬼信咩？

再者，現年40歲嘅普捷天奴，之前唯一教波經驗係帶領愛斯賓奴兩季多啲，直到舊年11月就畀人炒魷，雖然話佢之前領軍成績尚可，但查實佢係因為球員時代効力過呢隊西甲波，熟悉內部運作先掂，家陣突然轉新環境，仲要係出名惡搞嘅英超，力奇真係唔敢對佢有太大期望。

講番場波，修咸頓今鋪有隊長拉爾拉拿同守將荷西方迪缺陣，喺新帥帶領下仲要群龍無首，班波落到場隨時騰騰震發揮唔到，反而愛華頓由「爆炸頭」費蘭尼壓陣，出名波到腳到冇面畀，就算話中場吉遜同守將希拔缺陣都冇有怕，以佢哋近期作客3連勝去睇，今仗殺無赦啦！