AC狂鋒吹散博洛

猪拉多纳

大家好！之前歐洲聯賽歇晒冬，小妹乘機去咗旅行叉電，家陣真係成個人生猛晒，2013年第1次同讀者傾波經，遲係遲咗少少，不過都要老套啲講句，小妹喺度祝各位新年事事順利搵多啲，最緊要係身體健康！
艾沙拉維 柏仙尼喪入22粒

AC班友歇冬嗰陣唔知係咪玩到癲晒呢，上星期聯賽一重開，成隊「紅黑兵」好似遊魂咁，作客只能悶和森多利亞，唔緊要，今晚佢哋回師聖西路主場迎戰博洛尼亞，係時候威番鋪喇！事關蘊釀緊換血嘅AC近3次喺意甲主場出擊全勝，仲喪入9球僅失2球添，威力超勁呀！

係，AC傷兵問題真係幾嚴重，3位防中蒙達利、岩布仙尼、尼祖迪莊都唔踢得，守將耶比斯、邦利拿同埋安東連尼又養緊傷，不過AC一向靠搶攻搵食，上周中佢哋喺意盃鬥班霸祖記，法定時間都係失1球咋嘛，影響唔算太大吖。最重要係齋計聯賽，艾沙拉維同柏仙尼今季加埋入咗22球，只要佢哋同校炮手奇雲保定冇傷冇病，呢班波嘅鋒力肯定冠絕意甲！

對家博洛尼亞就陰功豬咯，上周中佢哋喺意盃落後國米2球、之後再發力追和踢加時，可惜最終都被「藍黑守將」蘭奴捷亞絕殺，體力蝕章之餘仲打擊埋士氣，你都咪話唔慘！咪忘記「博洛」係靠AC棄將基拿甸奴數胡，佢有幾多料，AC班人又點會唔知吖？仲有，「基佬」嘅鋒線拍檔亨利基文尼斯打柴、後上殺手施列迪泰達又傷埋，以佢哋10次意甲客戰輸8鋪嘅戰績，憑咩同AC鍊先？一於撐AC 2.02倍「讓主」啦！
推介：AC米蘭（讓球主勝）

微博傳情：第1次鋼琴伴奏好緊張

呢兩個月好多人結婚，上星期我嘅舊同事兼拍檔，終於同女朋友結束6年愛情長跑，結婚啦！而我亦喺婚宴度彈琴伴奏，第一次喺咁多人面前表演彈琴，又緊張、又好玩、又難忘！