仁迷畀啲時間哥帥啦！

猪拉多纳

德甲拜仁教練軒歷基斯已經六十七歲，教埋今季就正式退休，拜仁亦已經公布下季會由西班牙名帥哥迪奧拿接任。其實德國人唔鍾意賣關子，早早就交代晒來季人事變動，呢種處事方法同亞洲地區成日要等到最後一刻先講清楚好唔同。對於哥迪奧拿執教拜仁，「德粉」未有太喜出望外，似乎對佢唔多信任。

其實球迷及講波佬都係局外人，好多事情都未必咁了解。拜仁揀得哥迪奧拿做教練，肯定經過深思熟慮，尤其球隊裏面又有路明尼加、漢尼斯、森馬等軍師，唔使擔心拜仁會揀錯人。Peter覺得拜仁球迷要對哥迪奧拿保持客觀態度，太過負面對任何一方都唔係咁公平，不妨畀多啲時間哥迪奧拿，話唔定佢可以帶領拜仁再上高峰。老實講，喺Peter心目中只有費格遜及莫連奴係世界一級名帥，但現階段評定哥迪奧拿冇料到，以前帶領巴塞贏波全靠「符碌」就唔太恰當。而有一點Peter最欣賞嘅係，哥帥從來唔會認叻爭功名，將所有功勞畀晒班球員，做法確有大將之風。
軒歷基斯榮休夫復何求

另一方面，今季拜仁喺積分榜彈甩對手一段距離，老帥軒歷基斯好有機會擸埋個德甲冠軍獎盃先至榮休，做教練做到佢咁威水真係夫復何求。而哥迪奧拿有幸教到一支歐洲頂級大會，對佢職業生涯亦有幫助。老帥退出，少帥上任，正式係雙贏局面。查實哥迪奧拿都諗過度過先肯去拜仁，唔通你叫佢帶隊護級佢都肯咩。情況就好似NBA籃網，早前邀請前湖人教練積遜，「禪師」又點會騷你呀！
金句：急流勇退，走馬上任，雙贏之舉何樂而不為。