巴塞開入球「蘇」打氣

猪拉多纳

維蘭路華下周再到紐約醫病

巴塞隆拿主帥維蘭路華仍受腮腺癌困擾，下周一仲要再去紐約接受多兩個階段療程，為期成3、4個禮拜，但波仍然要繼續踢嘅！「地上最強」今晚喺西甲作客近況頗佳嘅皇家蘇斯達，想大炒未必係話咁易，不過皇蘇火力唔曳，今場憑主場之利同巴塞駁火未必輸蝕，入球大細中位數改做3.5球，照捧2.02倍入球大。

（now632台周日凌晨1:00直播）

上場巴塞喺西班牙盃主場畀馬拉加逼和，的確令人大跌眼鏡，但相信今次對皇蘇，布斯基斯、沙維、碧基等都會正選上陣，要延續聯賽嘅無敵強勢唔會有問題，何況仲要令「維帥」安心去美國醫病添。4屆「金球王」美斯連續13場正選入波、一共取得21球「士哥」唔在講，「地上最強」個個都係射得之人，難怪連續6場入球中位數開到3.5都照開大啦！至於上場對馬拉加兩度單刀失機、今季只係入到3球嘅阿歷斯山齊士，有傳已經成為球迷眼中釘，睇怕都係被打入冷宮居多喇。
皇蘇近10戰僅負皇馬

不過大家今場唔好淨係掛住睇美斯仔嘅神級表現喎，對手皇家蘇斯達作客僅負皇馬後亦都信心大增，近10場亦只係輸過畀「銀河艦隊」，絕對唔嘢小，佢哋除咗當家射手卡路士韋拿之外，對皇馬大演帽子戲法嘅皮亞圖亦都相當值得留意o架，呢件青訓產品升上一隊近10年嚟，都陪住球隊升降班，講鬥心肯定係全隊之冠！另一中場大將基沙文就話想做今季西甲首支擊敗巴塞嘅球隊，係大想頭咗啲，但證明佢哋一定會搏老命踢番場好波，入波又點會少先？