西布朗做「東」有胡叫

猪拉多纳

周日凌晨英超西布朗主場對阿士東維拉，好多球迷都讚西布朗係其中一支令人驚喜嘅英超球隊，但唔知係唔係畀人讚壞咗，近期演出明顯回落。不過度士唔相信西布朗會一直沉淪落去，今次對住弱隊維拉好有機會反彈，主W值得捧場。

（有線300及200台周日凌晨1時30分直播）

西布朗今季曾經上過積分榜頭五位，以一支規模有限嘅球隊嚟講，成績可謂合格有餘。縱然近幾場比賽有多少回落，但只要球員可以調整番作戰心理，好快就可以復甦。
維拉增兵至有得救

阿士東維拉今季有幾差唔使多講，最麻煩係班波失去鬥志，好多時失咗一球就已頭耷耷，而上輪聯賽對修咸頓就有類似情況，上半場輸個十二碼後就冇晒心機，最終又係主場跌晒三分。度士覺得維拉需要喺轉會市場買番幾個好球員，唔單止為某幾個位置作補強之用，新血注入亦可激發起球員鬥心。現時維拉好弱勢，西布朗可以靠今場翻身。