曼城煲魚生粥

猪拉多纳

耶耶托尼缺陣難炒富咸

英超富豪球會曼城上場打破聯賽作客阿仙奴37年不勝魔咒，踏入2013年三連勝兼不失，勢頭甚勁，但佢哋上場贏在晨早打多個，今次返主場對富咸要強攻，缺少參戰非國盃嘅耶耶托尼連繫攻守差好遠，「讓球主和客」「-2」實在太多，相信小勝一球機會最大，博富咸「讓球客勝」！

（有線300及200台周六晚11時直播）

曼城陣中有唔少球星，中場耶耶托尼絕對係星中之星，佢既可破壞對手攻勢，亦能由後場開始策動攻勢，屬大軍轉守為攻樞紐。曼城上次鬥阿仙奴一早打多個控制戰局，未見耶耶托尼缺陣對球隊影響有幾大，今晚必見真章。由於替補人選查維加西亞級數不足，中場大腦大衞施華要墜後幫手組織攻勢，進攻必受影響，即使中場拿斯尼停賽期滿，箭頭阿古路傷愈可候命，要大勝亦唔易。
懷斯細佬引發富咸內訌

富咸近期傳出內訌消息，曾効力該會嘅挪威球員希格懷斯大爆教頭祖爾乞人憎，隊內好多球員都唔鍾意佢，似為現正効力富咸嘅哥哥懷斯發聲。祖爾即時現身澄清話自己冇同任何球員不和，與懷斯關係亦好好，但空穴來風必有因，相信班波內部係有多少問題。不過，富咸今季鬥強隊有一手，作客阿仙奴同車路士都打和，造訪曼聯亦僅輸一粒。

翻查往績，曼城近六次主場對富咸僅贏一場，就係上季大勝3比0，全靠開波10分鐘靠個十二碼打破疆局，今次好難再贏得咁輕鬆。