朗尼回歸 射爆錘仔

猪拉多纳

紅魔貪盃大小通吃

正所謂大難不死必有後福，曼聯上場足總盃咁都追得番，今次返到自己地頭再鬥韋斯咸，「錘仔幫」仲有得剩嘅？上場驚險逼和對手2:2嘅紅魔，今晚有養傷多時嘅朗尼強勢復出，況且「錘仔殺手」尹佩斯喺後備席隨時候命，相信後防穿大窿嘅韋斯咸都難逃一劫，捧1.7倍「讓主」。

（now633及660台周四凌晨4:05直播）
韋斯咸防線天殘地缺

自從聖誕節整傷膝部之後，朗尼一直養緊傷，但查實「魔童」已經全面復操，周日「雙紅會」前夕仲自動請纓落場，不過領隊費格遜就錫住佢，想朗尼抖多幾日，但都睇得出呢位英格蘭射手幾咁餓波，預計今晚拍住查維亞靴南迪斯攻堅，韋斯咸門將積亞基連倫肯定有排忙！

亨格比利唔係睇小韋斯咸，只不過佢哋條防線真係好擇使，上場足總盃梅開二度嘅中堅占士哥連斯小腿肌肉撕裂肯定唔出得，一對閘位球員祖爾奧拜恩同佐治麥卡尼又養緊傷，難怪領隊艾拿戴斯牙痛咁聲，前晚向傳媒話趕住入貨想補番件中堅同左閘。
曼聯奧脫福交手5連勝

雖然曼聯呢邊都有一對中路守將尼曼查維迪同莊尼伊雲斯上陣成疑，但菲爾鍾斯同基斯史摩寧上仗鬥利物浦都只係踢咗一陣，預計今仗會齊齊擔正。話就話曼聯要兼顧聯賽同歐聯兩大戰線，但上次去到烏普頓公園球場落後1:2，費爵爺都掟尹佩斯落場搏殺，證明連呢隻盃仔佢老人家都想要，況且尹佩斯對上4次鬥韋斯咸省入5粒，紅魔近5次主場鬥「錘仔幫」又贏晒，當中仲有4次球差係2球以上，瓣瓣都剋住韋斯咸，「讓主」點可以唔捧呀？
英足總盃賽制

今輪為第3圈重賽，如法定時間內打和將加時30分鐘，未分勝負則以互射12碼決勝。
Data King：錘仔訪奧脫福勁食白果

‧尹佩斯對上4次面對韋斯咸總共射入5球。

‧韋斯咸近4次造訪曼聯輸晒兼冇波入。

‧雙方最近3場波都開入球大。
乜都玩錦囊：博紅魔炒3、4蛋波膽

兩隊波近期都頻頻開大，照計中位數為3.5球嘅入球大係幾好路，不過韋斯咸對上4次造訪奧脫福都食白果，買大即係要靠晒曼聯入波，寧願玩波膽仲明智！曼聯贏3:0、4:0分別有8.5同13倍，博得過吖！

賽果熱線：2707 9900

周四凌晨4時50分起至晚6時止