史雲斯「倫敦Style」再爆廠

猪拉多纳

另一場英格蘭足總盃第三圈重賽，阿仙奴主場對史雲斯，兵工廠上次交手未能解決對手，令自己陷入地獄賽程，由上仗不敵曼城計起，十日內踢四場波，領隊雲格慳住使下不宜高估。史雲斯今季成為「倫敦殺手」，上周中英聯盃作客照贏車仔，更加唔會赦阿仙奴，受讓要「讓球客勝」。

（now 635周四凌晨3時30分直播）
對倫敦兵特別醒

阿仙奴上次對史雲斯佔唔到甜頭，今場主W熱至1.4倍，好大程度受兵工廠名氣影響。兵工廠最大隱憂係面臨地獄賽程，剛於星期日大部分時間打少一人輸畀曼城，今晚就要對史雲斯，嚟緊周日作客車路士，下周中又要應付另一場倫敦打吡對韋斯咸。領隊雲格難免會輪換部分主力，尤其係球隊目標始終係打入聯賽前四，爭取歐聯入場券，足總盃現時只係第三圈，相比之下顯得較次要。

史雲斯今季對倫敦球隊表現特別醒神，對昆士柏流浪、韋斯咸及富咸都贏晒，聯賽及上周中英聯盃四強首回合對車仔錄得一勝一和，首循環英超亦作客贈阿仙奴兩蛋，只係輸過畀熱刺一粒。加埋上次打和兵工廠2比2，史雲斯今季八鬥倫敦球隊取得5勝2和1負，未踢已先贏信心，「讓球客勝」有2.67倍的確抵玩。