里爾格食格專剋聖伊天

猪拉多纳

法國聯賽盃今晚上演4強賽事，由暫列法甲中游嘅聖伊天主場迎戰里爾。由於里爾往績一向食住聖伊天，而且翼鋒皮耶狀態大勇，3.05客W值得冷敲。（開賽時間︰周三凌晨3:55）
米高盧特立次子加盟聖伊天

聖伊天雖擁主場之利，但近況認真麻麻，近8戰1勝4和3負，贏嗰隊仲要係乙組嘅卡昂，更令人擔心係佢哋入球能力疲弱，除咗贏卡昂嗰場入咗3球外，其餘7場對住同級球隊先入得兩粒，最慘係防守又唔掂，近4戰又場場失波，正宗攻不銳守不穩，加上主力中場麥斯格拉度同守將高林要暫時離隊去踢非洲國家盃，兩名借將包括南錫翼鋒尤漢摩路，同埋米高盧特立個第二仔、丹超洛斯查蘭特主力安德烈斯盧特立又同隊波未夾熟，攻守能力進一步下降，真係幾難撐得落手。

反觀里爾雖同樣有前鋒沙洛文卡勞以及文迪斯達加卡要踢非國盃唔喺陣中，但唔好忘記佢哋有位入波當食生菜嘅皮耶喺度，呢位法國翼鋒唔單止腳法上乘，仲要連續5場攞到「士哥」，今晚分分鐘射死聖伊天。更重要係里爾對住聖伊天有「格食格」味道，近4次對賽贏晒不特止，當中3場仲要係作客贏波，試問聖伊天今晚點樣招架！
法聯盃賽制

今仗為法聯盃4強賽事，比賽一場過定勝負，若法定時間打成平手就要加時，再和就要互射12碼。