喜鵲作客諾域治中門「大」開

猪拉多纳

一隊球隊，無論老闆幾有熱誠、領隊幾咁有料，但當球隊一遇到傷兵潮，就真係即刻坐喺度，神仙都難變。紐卡素兩大主力卡比耶、賓艾化仍因傷缺陣，而丹巴巴亞亦已離隊去咗車路士，「喜鵲」呢一刻真係想飛都飛唔起。球隊近期中門大開，場場都輸到大大鑊，作客諾域治又係要繼續（目及）實大盤。

（有線304及204台周六晚11時直播）
傷兵滿營防線崩潰

紐卡素上季喺柏杜調教下，踢得有板有眼，基本踢法、陣容都唔曳，但本季傷兵名單水蛇春咁長，試問又點踢得番原本水準？近期佢哋豁出去，聖誕快車賽期對曼聯同阿仙奴分別輸3比4同3比7，新年首戰對愛華頓又輸1比2，然後足總盃再淨負低組別嘅白禮頓兩粒出局，防線完全崩潰，雖然今場有高洛仙尼壓陣，但呢名隊長意興闌珊，要求離隊返阿根廷搵食，目前一條防線唔慌穩得去邊。

諾域治目前排中游，今季打出唔少代表作，主場出擊一定肯攻，上次鬥曼城都入到3球。攻擊線上有隊長格蘭荷特上陣，火力有保證，今場投X首選大盤，而諾域治小讓平半亦可兼顧。