修咸頓平手盤發到「維」

猪拉多纳

英超喺聖誕新年期間趕咗一輪快車，上周末歇一歇，今日戰火又試重燃。除咗聽晚曼聯對利物浦同阿仙奴對曼城兩場大戰外，今晚嘅7場波其實亦好有睇頭。而今日想同大家分享嘅，就係阿士東維拉主場迎戰修咸頓呢場護級重頭戲。
維拉防線唔掂

維拉今季大搞青春班，成績可謂慘不忍睹，暫時排喺聯賽榜16位，比起今場對手修咸頓只多1分，而且仲要打多1場添，所以今晚呢場係名副其實嘅6分波嚟！維拉喺聖誕快車期間踢4場只係攞得1分，慘吞車路士8蛋嗰場相信大家仲記憶猶新，就算主場對住同級嘅韋根亦要慘敗0比3，都咪話唔羞家。

近排維拉係咁食蛋都食到滯，其實主要問題出於條防線，維拉欠缺一位有經驗嘅球員在場中帶住班小將，先至搞到防守雜亂無章，成日出現因為失位而走甩對方球員嘅情況，對住熱刺所失嗰幾球就尤其明顯！加上好多時球隊喺失咗第1球之後，班年輕球員礙於經驗問題未能及時修正，之後就梗係兵敗如山倒啦！
作客坐和望贏

修咸頓方面，季初佢哋都有前面入埋唔夠後面輸嘅毛病，但經過半季調整後已有明顯改善，吉田麻也、荷西方迪同積克確克等組成嘅防線已經逐漸建立默契，快車期間仲喺主場逼和過阿仙奴添！佢哋今季作客成績都唔曳，對住史篤城同富咸兩隊主場威力不俗嘅球隊都可以保持不敗，已見到好大進步啦！

加上中前場球員好似列基林拔、加斯頓拉美利斯等都有番咁上下質素，所以即使係作客場合，亦絕對有力攻破維拉脆弱嘅防線。今場馬會開出平手盤，小妹推介修咸頓，估計佢哋可以坐和望贏。

（有線302及202台周六晚11時直播）
Wendy推介：

阿士東維拉 對 修咸頓

平手盤：修咸頓