PSG圍剿阿些斯奧

猪拉多纳

「鋒霸」伊巴謙着晒火

法甲戰火重燃，今晚就有領頭羊巴黎聖日耳門迎戰護級分子阿些斯奧，儘管近期有關射手伊巴謙莫域嘅負面新聞不絕，但呢位近5場聯賽入6球嘅「鋒霸」，絕對可憑一己之力砌低近況不濟嘅客軍，就算今場讓到兩球，2.15倍「讓球主勝」都博得過。

（開賽時間：周六凌晨4:00）
前鋒賀拉奧離隊冇有怕

近排唔少法國傳媒都話伊巴謙莫域「功高蓋主」，除咗贏波後當面鬧爆隊友「踢波仲差過自己個囝囝」外，更有指上季法甲神射手利尼畀伊巴謙逼到要離隊，最誇張嘅係話佢仲有份幫安察洛堤點兵，撈埋助教嗰瓣！雖然球會總監李安納度已經出面澄清話冇啲咁嘅事，但正所謂樹大招風，亦證明咗呢位半季入18球嘅「王牌」喺球會地位有幾高，PSG近6場正式賽事全勝之餘，更連炒華倫西恩斯及伊維恩4蛋，有佢喺度，就算前鋒賀拉奧啱啱宣布正式過檔中超大連阿爾濱，PSG都一樣冇有怕啦！
阿些斯奧近8戰僅1勝

隨住1月轉會窗開啟，備受注目嘅新星盧卡斯洛迪古斯亦已正式加盟，如果佢同「大佬謙」夾得掂嘅話，相信PSG到下半季都可以繼續橫掃法甲，試問要護級嘅阿些斯奧又邊有資格做攔路虎先？查實阿些斯奧近8場只贏過1次咁大把，加上施加馬利迪亞拉、科仙尼迪亞華拉等5名球員要出戰非國盃，搞到實力大削，喺法國足總盃仲遭丙組嘅魯昂淘汰添！對住「一哥」聖日耳門，唔係仲想全身而退吓話？