ＱＰＲ唔吼盃賽捧對家

猪拉多纳

今晚由英格蘭足總盃做主打，肥叔睇中場英超內訌，昆士柏流浪（QPR）上仗爆冷擊敗車路士，今次主場對西布朗做平手盤，睇落好似好抵玩，不過呢班波志不在盃賽，絕對不宜高估，今場捧對家！（周六晚11時開賽）
西布朗唔上唔落啱胃口

昆士柏班底唔算好，勝在依家有個好教頭夏利列納，佢出名識得部署，上場搞掂車路士絕非單憑運氣之助，夏利叔知道球隊目標係乜，唔會亂咁於盃賽浪費力氣影響護級前途，佢寧願專心於轉會市場搵新兵多過爭盃啦！西布朗聯賽唔愁降班，爭入前列又有難度，唔上唔落，最適合於盃賽搏殺，平手盤博得過！

同日英超球隊富咸主場對英冠仔黑池，富咸中前場好多優質兵，計級數可以企穩英超中游，對住黑池坐底超一班，有埋主場之利優勢更加明顯，依家讓半一至一球，個盤都幾硬淨，應可順利贏波贏盤。另外西甲重開，利雲特實而不華，長期有筍盤，今次主場對畢爾包做緊平手盤或讓平半盤，盤口合理，呢場可再捧利雲特。