華倫冬後特醒 破格冇難度

猪拉多纳

西甲歇冬後重開，自換帥後漸入佳境嘅華倫西亞今晚作客弱旅ＣＦ格蘭納達，過往「蝙蝠兵團」於冬後第1擊格外醒神，近4季取得3勝1和，幾位射手蘇爾達杜、莊拿斯干卡維斯、希度華迪斯輪流發威，加上對賽往績贏晒，集結咁多利好因素都只係小讓平半，雖係作客但仍覺筍爆，上盤咪錯過。（now 632周日凌晨1時直播）

換帥如換刀，華倫西亞季初聘用少帥比歷堅奴，呢位華倫舊將之前只係於紅軍同國米做過賓尼迪斯副練，明顯經驗唔夠，搞到內部立立亂，尤其作客戰績極曳，最終被炒只係順應民意。新帥華爾維迪名氣一般，最威水只係帶領愛斯賓奴攞到07年足協盃亞軍，但論經驗就遠勝比歷堅奴，剛接手先做好防守止住跌勢，帶隊5仗贏咗4場，成班波士氣返晒嚟。另華爾維迪又好識激發球員積極性，射手兼隊長蘇爾達杜近4仗入3粒，固然深得器重，巴西球星莊拿斯干卡維斯亦一改懶散作風，勤於走動並串連進攻，於新帥面前爭取表現，加埋後備殺手希度華迪斯屢有驚喜，因此絕對唔使擔心華倫的攻擊火力。
格蘭納達火力疲弱

ＣＦ格蘭納達攻守都唔掂，不但近10聯賽只贏2場，仲係西甲攻力最弱球隊，總共入得13粒咁大把，真係曳到冇朋友，況且近兩次對華倫輸晒，「蝙蝠兵團」今仗作客可以坐和望贏，斯維認為以半個盤博一個盤十分值博，華倫上盤實係信心之選。