車仔搶W聖人都冇面畀

猪拉多纳

丹巴巴亞殺到 肥賓盃王本色

富豪球會車路士近況如坐過山車，上輪聯賽主場鬥包尾大幡昆士柏流浪輸波最大鑊，不過主帥賓尼迪斯向來係盃賽專家，不論喺華倫西亞、利物浦同國際米蘭時代都與盃有緣，現時內部立立亂，賓帥要交功課，英格蘭足總盃絕對不容有失，加上丹巴巴亞昨晚落實加盟，今晚大軍於足總盃第三圈作客「聖人」修咸頓，熱捧車仔客Ｗ！（now 633及660周六晚11時直播）
歐聯出局誓保「私家盃」

車路士快車期狂數阿士東維拉彈上高峰，但上仗主場輸畀昆士柏流浪又頹番。冬季轉會窗重開冇耐，車路士動作多多，以靚價位放走射手史杜列治後，再以超筍價簽下紐卡素中鋒丹巴巴亞，此子今戰有機會落場搏殺，其他球員為免失寵被踢走，點都要加多兩錢肉緊搏命。車仔續有門神施治、中堅泰利及中場奧里奧爾羅美奧等養傷。

好彩車帥賓尼迪斯向來有盃賽命，執教華倫西亞捧過歐洲足協盃，轉飯鑊去利物浦亦贏過足總盃、社區盾、歐聯同歐洲超級盃，執教國際米蘭亦好好命，執咗隻意大利超級盃同世界冠軍球會盃。除咗賓尼迪斯有盃賽命，車路士近年都同足總盃有緣，過去六屆有四屆成為冠軍，擺明係各領隊討好班主阿布嘅續命丹，兼且今屆歐聯已出局，更唔會放過足總盃。
修咸頓護級無謂搏

修咸頓經過半季適應期後，現時已經學識對付英超對手，上仗於主場以壓迫踢法打和阿仙奴，完全不落下風，表現醒神。不過，修咸頓季內首要目標為護級，之前於聯賽盃慣性收起射手列基林拔及加斯頓拉美利斯等主將，預計今戰都唔會全力搏殺，大軍後備兵級數遠不及車仔，即使主場出戰都唔夠砌。
車路士近10屆足總盃第三圈成績(不計重賽)

年份 戰果(半場)

2012 主勝樸茨茅夫4:0(0:0)

2011 主勝葉士域治7:0(3:0)

2010 主勝屈福特5:0(3:0)

2009 主和修安聯1:1(1:0)

2008 主勝昆士柏流浪1:0(1:0)

2007 主勝馬爾斯菲6:1(2:1)

2006 主勝哈特斯菲爾德2:1(1:0)

2005 主勝斯肯索普3:1(1:1)

2004 客和屈福特2:2(2:2)

2003 主勝米杜士堡1:0(1:0)

總計：8勝2和