曼城元旦「和」氣生財

猪拉多纳

英超防守「一哥」史篤城唔慌輸得多

新年「雙城大戰」今晚爆發！2013年首個英超夜，曼城喺主場硬撼史篤城嘅銅牆鐵壁，撞啱「藍月亮」一班射手畀文仙尼省完後大爆發，迪斯高更踢出身價，喺自己地頭要小勝問題唔大，一於捧曼城3.7倍「讓和」喺新年有好開始！

（有線201及301周二晚11:00直播）
後備殺手迪斯高交到貨

仲記得曼城輸畀新特蘭後，文仙尼狠批一眾貴價前鋒係「軟皮蛇」，結果班友仔鬧一鬧即時醒晒，上場10人應戰仍然力壓諾域治，主角當然係一開波就連入2球嘅前鋒迪斯高啦！查實佢今季雖然只有6次正選上陣，但就攻入全隊最多嘅8球，效率奇高。小妹最欣賞嘅係佢雖然長期做後備，上仗仲話冇諗過自己有正選，但一落到場仍然肯搏殺交到貨，難怪獲文仙尼投以信任一票，今仗有望繼續孭飛，拍住上場休戰嘅泰維斯，唔怕攻唔陷史篤城條血肉長城。
史篤城作客只得一勝

睇往績，曼城4次喺英超主場鬥史篤城全勝之餘更1球未失，好似佔盡優勢，問題係「藍月亮」今季防線唔多穩陣，對住近排火力大增、2場入6球嘅史篤城，要保住清白並唔容易，冇條件派蛋。況且史篤城經過20輪英超賽事後只失17球，防守力列英超之首，想炒起佢哋唔係咁易o架！

不過小妹對史篤城今季作客嘅表現始終有些少保留，佢哋整季作客只係贏過1場咁大把，10場不敗走勢睇怕都要斷纜喇。
史篤城鐵桶陣做「細」

曼城近況唔多穩陣，上次主場對雷丁都要補時先入波，雖然史篤城不擅作客，但防守硬淨今季10戰只有1場失波多過2球，今場佢哋自知牌面輸蝕，相信多數擺鐵桶陣守足90分鐘，一於博佢哋開細。
曼城主場必有波入

‧史篤城近10場不敗。 ‧史篤城近5場作客開細。

‧曼城所有主場比賽都有波入。 ‧曼城近4場主場3場開細。