飛腳柏雷素爾大決戰

猪拉多纳

兩個李安度元旦猛虎出柙

天皇盃決賽今日喺東京國立競技場舉行，大阪飛腳同柏雷素爾合演09年決賽翻版，飛腳王牌前鋒李安度蒙迪拉同柏軍星級中場李安度杜明基斯雙雙復出，兩個「李安度對決」成為焦點，兩隊攻強守弱，今季四次碰頭全部大晒，追多次大盤！

（有線148台及now 711周二下午1時直播）

大阪飛腳降班後專心喺天皇盃爭冠，中場指揮官遠藤保仁搏埋條老命，對上三場都有士哥，成為晉級功臣，今戰射手李安度蒙迪拉停賽期滿，遠藤可以專心分波，唔使殺得太前攻門。另一主力家長昭博借用合約本來喺尋日屆滿，佢破例延長一日踢埋場決賽，呢個進攻鐵三角再次合體，又可大踢喪攻足球。
今季4度交鋒喪入波

柏雷素爾巴西中場李安度杜明基斯同樣停賽期滿，今仗將會重返正選陣容，有咗呢個死球王在陣，班波入波本錢大增，唔使好似上場踢得咁辛苦。柏軍年輕射手工藤壯人連續兩場射入奠勝球，表現冇得頂，不過，佢喺決賽要坐波監，好在大軍仲有澤昌克同田中順也等攻擊球員頂上，仍能保持強勁火力。

兩隊09年喺天皇盃決賽九十分鐘內互交白卷，飛腳戰至加時下半場尾段入波驚險捧盃，不過，兩隊防守力大不如前，今季四次碰頭全大，柏雷素爾取得3勝1和，包括喺聯賽作客大勝6比2，李安度杜明基斯4戰入4球勁到爆，飛腳射手李安度蒙迪拉上次鬥柏軍亦入兩粒，兩個「李安度」鬥入波，捧大最好！