曼城史篤城尾站慢駛

猪拉多纳

新年攞頭威 揀個「半場細」

英超聖誕及新年快車去到最後一站，富豪球會曼城元旦日會喺主場迎戰爛仔波史篤城，曼城連續兩場作客都搏得好盡，吊頸都要抖吓氣，今戰唔會攻得太急，佢哋喺主場歎慣慢板，聯賽主場10戰８次開出半場細，今次對住聯賽防守王史篤城，上半場入波唔會多，想發新年財，不妨玩吓「半場細」！

（有線301及201台周二晚11時直播）
對住鐵桶陣有排磨

曼城上次對諾域治打少個照贏4比3，開出「客其他」，贏在反擊效率高，射手迪斯高上仗梅開二度表現醒神，今場對手後防多高佬，用番阿根廷孖寶泰維斯同阿古路更啱踢，預期佢哋會控制戰局，但想拆散史篤城鐵桶陣要勁有耐性搵機會。曼城進攻中場拿斯尼上仗領紅，除非上訴成功，否則冇得落場，班波連拚後有疲態，唔易咬得入對手，若然發揮唔順，隨時好似早前鬥雷丁磨到尾段先贏。

史篤城上場對修咸頓缺少右閘謝夫甘馬倫同中堅梳爾哥斯，防線大執位甩漏多走晒樣，今戰兩個大將停賽期滿復出，防守中場尼桑斯上場攞紅牌正上訴，今場亦可披甲，有可望回復防守王本色。史篤城連續10場聯賽不敗，全靠防線夠穩定，開季至今20戰僅失17球，數字係英超最低，大軍三線球員個個都好爛打，擅長以體力化踢法壓迫對手，破壞力驚人，佢哋作客出戰會專心防守，等待死球先空襲曼城，上半場有氣有力，唔怕對手班大牌球星。
兩隊80％數據夠硬淨

睇番今季曼城10場聯賽主場成績，除面對死敵曼聯同實力分子愛華頓開出半場大外，其餘8戰頂盡得1球交收，反映佢哋踢得滋油淡定，睇住嚟食。史篤城今季聯賽作客10戰咁啱都係開出8場「半場細」，近3次都同對手半場交白卷，防守力驚人，兩隊數據同樣咁硬淨，呢個「半場細」值得一試。