兵工廠 紐記 狂歡入球Show

猪拉多纳

告別2012當弗射手開P

英超快車成為阿占今個聖誕同新年嘅最好「朋友」，抖完兩日今晚又有得睇，吸引嘅戲碼首選阿仙奴主場迎戰紐卡素。兩隊出名火力強，禾確特近期改踢正前鋒後，兵工廠更加愈戰愈勇，兼且「喜鵲」非洲雙煞亦腳風一流，今日喺佢哋2012年最後一戰肯定會大騷Quali搶食尾胡，1.57倍入球大幾大都要捧場！（有線200及300、廣東體育周日凌晨1:30直播）
禾確特踢正前鋒愈戰愈勇

阿仙奴今季表現飄忽令人失望，不過捱吓捱吓，近期已經喺英超拎到3連勝，最大改變係領隊雲格終於放生禾確特，畀呢位英格蘭國腳踢佢最想踢嘅正前鋒位置。根據阿占嘅觀察，禾確特的確有亨利當初由翼鋒轉前鋒嘅影子，尤其係靈活走位、高速入楔等特質，都係好前鋒嘅重要元素，雲格呢招應該算成功。

雲格同大家都知道阿仙奴防守向來好一般，進攻似乎係佢哋唯一出路，好彩兵工廠勝在大炮多，普多斯基同阿歷士張伯倫都可以為禾確特提供彈藥，辛迪卡索拉、阿迪達同韋舒亞亦有後上入波能力，今場目標就係入波要多過失波，呢場大騷肯定好睇。
「喜鵲」傷停多冇龜縮本錢

紐卡素啱啱同曼聯激戰慘輸3:4，但其實佢哋有賓艾化同卡比耶等主力受傷，同曼聯打到咁接近已經交足貨，傷兵滿營兼有中堅米克威廉臣停賽嘅「喜鵲」，依家最把炮就係丹巴巴亞同柏比斯施斯呢對雙箭頭，既然紐卡素根本冇龜縮本錢，今場作客肯定會同阿仙奴死過！

頂占筍盤：阿仙奴（入球大）
兵工廠近排場場有波入

‧阿仙奴近4場不敗。

‧阿仙奴近5場都有入波。

‧紐卡素今季作客未開齋。

‧紐卡素近5場作客全數敗陣。
乜都玩錦囊：紐記洩氣玩主W

紐卡素上場3次領先曼聯最後都要輸波，士氣大受打擊，佢哋最大麻煩係傷兵多，人腳短缺下仲要連續作客2場硬仗，加上今季防守不穩，對住上場對韋斯咸比賽取消、養精蓄銳搏殺嘅阿仙奴，實在不宜睇高，主W可以諗諗。