布力般送走瘟神打爭氣波

猪拉多纳

今晚英倫快車連場激戰，阿King就睇中英冠班士利主場對布力般流浪，前者排緊尾二之餘，近6主場輸5仗，雖然布力般亦唔好得幾多，但該隊剛送走冇料兼犯眾憎教頭貝治，大軍士氣回升唔少，並有傳曉士會回巢接手，眾將必專心踢好波，於新帥來之前爭取表現，今仗遇弱係反彈好時機，小讓平半博得過。

（周六晚11時開賽）
串侯城大錫菲聯讓球勝

另一場英冠賽事，列斯聯回復大盤王本色，射手比治奧腳風順番，近期頻頻有士哥，可惜條防線認真唔掂，近六仗失成十五粒，作客二哥侯城難望有大改善，加上兩軍近6碰頭有5次開大，呢場大盤走唔甩。最後英甲榜首錫菲聯主場出戰包尾嘅哈特普爾，強弱懸殊冇得打，「讓球主勝」實食冇黐牙。
布力般想搵印度鄉里執教

布力般流浪啱啱炒咗領隊貝治，邊個接手成為佢哋球迷最關心問題，除咗盛傳球會可能搵前領隊曉士回巢執教，亦有報道指球會嘅印度班主想益自己友，考慮起用39歲嘅同胞祖丹阿里接掌帥印。祖丹阿里曾經做過阿仙奴訓練員及印度15歲以下國家隊教練，依家就係達根咸地區青年軍教頭，如果成事，佢將會係英格蘭史上首位亞裔領隊。