車仔 諾域治射手「大」戰

猪拉多纳

費托回勇 格蘭荷特復出

英超快車「拆禮物日」大戰今晚連環上演，諾域治喺主場對車路士，玩1.68倍入球大最着數。今場諾域治有王牌射手格蘭荷特傷愈復出，「車仔」就有費托回勇，加上班巴西兵集體發威，夠晒條件合演入球騷。

（有線201及301周三晚11:00直播）

諾域治日前作客以1:2不敵西布朗，開季至今攻入4個聯賽入球嘅射手格蘭荷特因傷避戰，但據講佢已經擺脫傷患，今場可以重返正選陣容，要知道諾域治連盃賽近16戰得1場食白果，火力非常有保證，即使對手係「車仔」都唔憂冇波入。
「森巴藍戰士」喪攻唔守

另方面，「車仔」喺世冠盃決賽失利後，回歸英超即刻強勢反彈，先喺聯賽盃作客以5:1大勝列斯聯，跟手再喺聯賽主場以8:0摧毀阿士東維拉，頂入靚頭槌先開紀錄嘅射手費蘭度托利斯，個人近6場勁入7球，似乎真係回勇唔再敗家喇。

講到「車仔」上仗能夠以大勝迎接聖誕，最大功臣應該係陣中4個巴西球星，包括中場奧斯卡杜斯山度士、拉美利斯、盧卡斯皮亞桑同中堅大衞雷斯，面對維拉攜手交出3個入球、4次助攻，當中大衞雷斯推前串演防守中場更加被激讚，有佢哋幫手係有大把入波睇，不過呢幾位仁兄都係攻強於守，顧前唔顧後，防線隨時失番一、兩球，咁嘅環境，都係撐入球大着數過玩1.53倍客W。