水晶宮勢銳衝擊卡城

猪拉多纳

拆禮物日除咗英超之外，英冠、英甲同樣開快車，阿King今日重心推介英冠水晶宮。呢支倫敦球隊對上二十場聯賽僅輸一次，今輪作客榜首嘅卡迪夫城一樣冇有怕，捧「讓球客勝」。

（周三晚11時開賽）

今晚英冠可謂大戰連場，除咗水晶宮作客鬥卡迪夫城，目前排第二嘅侯城於主場鬥第五位嘅李斯特城，勝負對爭升班形勢亦有直接影響。先講卡迪夫城主場鬥水晶宮。水晶宮今季經歷災難性開局，頭三輪聯賽全部輸晒，好彩球隊及時撥亂反正，之後二十場聯賽取得十二勝七和一負，前黑池領隊荷路維於十一月上任令球隊升呢，現已升上聯賽榜第三位，有力爭取直接升班席位。卡迪夫城目前能在聯賽榜帶頭，實力當然有番咁上下，不過佢哋剛剛作客激戰另一支升班熱門李斯特城，雖然贏波但消耗不少體力，冇把握贏表現硬淨嘅水晶宮，主隊讓波捧「讓球客勝」。
奧咸翻嗒唐卡士打

另一場大戰侯城主場對李斯特城，侯城聯賽四連勝狀態弗爆，相反李斯特城兩連敗，氣勢稍見回落，主隊今場竟然唔使讓波，有蠱惑味道，李斯特城對上四場作客全開細，再追細盤較穩陣。最後一關揀英甲賽事奧咸主場鬥唐卡士打。唐卡士打排名雖然遠勝對手，不過作客演出唔算穩定，連盃賽在內對上三場作客未贏過，加上月初雙方曾在足總盃第二圈碰頭，當時奧咸主場以三比一擊敗對手，今場平手盤寧捧主隊。