曼聯誓擒天鵝

猪拉多纳

英超聖誕快車專家曼聯強勢作客撲擊「黑天鵝」史雲斯，「紅魔鬼」對上九季快車期首戰全勝，未踢先贏心理，大軍兵力雄厚，近期喺聯賽五連勝勢頭好勁，教頭費格遜落咗柯打要企穩榜首位置過年，眾將莫敢不從，今戰熱捧客勝！

（有線300及200台周日晚9時30分直播）

曼聯近期順風順水，對上六戰贏五場，唯一敗仗係歐聯例行公事半力出擊輸波，賽績可以抹咗去。佢哋前仗打謝死敵曼城，上場輕取新特蘭耗力唔多，兩大射手尹佩斯同朗尼着晒火輪住士哥，連隊長尼曼查維迪都可復出扼守中路，隊中傷兵拿尼、香川真司同路爾斯安達臣等都唔係重心人物，大軍基本上可以最佳人腳同狀態進入快車期，有利連拚搶分。
紅魔食慣快車頭胡

「紅魔鬼」教頭費格遜老謀深算，快車期喜搶頭胡，對上九季都成功喺呢段期間先拔頭籌，搏殺好少失拖。老費今場賽前又發表偉論，佢話只要曼聯喺新年坐住榜首位置，奪冠機會高唱入雲，呢番說話唔單止係畀對手聽，仲係暗地裏向一眾球星施壓，要佢哋加多幾錢肉緊，大軍現時領先曼城六分，若能進一步擴大領先優勢，其他對手真係幾難追。

「黑天鵝」史雲斯係英超技術流代表球隊之一，甚至有人將佢哋形容英超巴塞，呢隊波傳送同控球能力高，但略嫌有啲迂迴，即使落後情況下都傳足十幾廿腳先肯射，呢類球隊順起上嚟踢到曉飛，但唔多擅於逆境波。史雲斯經歷聯賽兩連敗，明顯不在最佳狀態，而且過分倚重射手米捷，易被對手盯防，佢哋上季兩戰「紅魔鬼」輸晒，今次亦難望搶分。