馬體會開殺戒

猪拉多纳

射手法卡奧腳風順

馬德里體育會今季愈戰愈勇，依家排喺西甲第2位，比皇馬仲要高，當中主場正式賽事更錄得跨季15連勝，加上射手法卡奧今年表現大熟大勇，喺2012年已經射入咗49球，今晚迎戰「作客蟲」切爾達，隨時大開殺戒，1.72倍「讓主」秤先。

（now632台周六清晨5:00直播）
切爾達作客腳軟

馬體會今季聯賽主場8戰全勝，場場至少攻入2粒，計埋盃賽近6次主場仲保持清白身，稱得上係攻守兼備。雖然上場輸畀巴塞隆拿令爭標機會大減，但佢哋今季誓要騎住同市宿敵皇馬做馬德里一哥，單係呢點已值得睇好。儘管有傳射手法卡奧會喺冬季轉會巿場重開時離隊他投，今仗隨時係佢最後一次為馬體會上陣，但無論結果係點，呢位哥倫比亞箭頭肯定希望射入2012年第50個入球，以報答球迷支持。

另邊廂嘅切爾達作客戰績慘不忍睹，至今僅得1勝7負，每場仲要平均失差唔多2粒，加上後防大將森美爾洛卡同羅拔圖拿高傷埋唔踢得，睇嚟成條防線今晚對住馬體會肯定頭都痕埋，輸少當贏！