C9回歸皇馬「-2」照攞威

猪拉多纳

正所謂殺雞焉用牛刀，不過阿仙奴、巴塞同皇馬即使喺剛戰盃賽面對次幾皮對手，都接近夫添出擊，結果「兵工廠」同「銀河艦隊」齊齊倒灶，巴塞雖然有美斯梅開二度，亦僅以2:0擊敗乙組仔，相信都冇人收貨。其實無論本土盃賽或歐霸盃戰線，強陣出擊往往唔等於大炒，有時由新仔掛帥隨時仲有驚喜。

今晚「銀河艦隊」返西甲主場迎戰愛斯賓奴，由於賓施馬未必踢得，撞啱對家換帥後連續兩戰不敗，今場入球大細中位數上調至3.5球，無疑鼓勵大家博入球細，博「讓球主客和」嘅「+2」亦似乎講得通，但筆者就覺得今場係皇馬反彈嘅好機會，1.72倍「讓球主勝」屬大路之選。
愛斯賓奴換帥後冇驚喜

首先皇馬係唔會因缺少賓施馬而冧檔，皆因C朗要由「C7」變番做「C9」打正箭頭，仍然係入球保證，再由荷西卡利祖擔任輔鋒，相信火力唔會相差太遠，有望延績近6次同愛斯賓奴交手，有5次淨勝3球嘅走勢。

其次係愛斯賓奴改由艾古爾領軍後，係就係兩戰不敗，但悶和下游嘅CF格蘭納達，基本上冇乜大不了，上場人多打人少都贏唔到西維爾，亦係令人失望，雖然一班高層口口聲聲話1月有錢買人，但喺冬季轉會窗重開之前，都唔似係皇馬對手。

（now632台周一凌晨2:00直播）
足球重心：皇馬、拿玻里（讓球主勝）

馬膽推介：11場(2)好心思

連續兩場負於超級馬「歡樂時光」無話可說，上場形勢不利仍然後上如箭，就更證明仲有貨賣，今戰有快馬「威威加瑪」拉鬆馬群，排1檔應唔怕被困。