韋斯咸「+1」打窒西布朗

猪拉多纳

西布朗蜜月期已過，一時三刻未係反彈時候！今輪佢哋主場迎戰韋斯咸，主隊近三場聯賽全敗，道氣已被打窒；加上後防大將賓科士打同列治維都因傷缺陣，大有機會繼續失分。韋斯咸夠晒韌，作客有力一砌，受讓之下「讓球客勝」捧得過！

（有線300及200台周一凌晨零時直播）

睇Samvo肥叔專欄，周時睇到「實力評級」呢個字眼。專家以球隊實力、往績、人腳等做標準，來評定班波屬邊個等級，以用作開盤之用。絕大多數球隊都有其「既定位置」，例如曼聯屬前列分子，若其聯賽排位不合理地低，就可以放心捧佢哋反彈。以西布朗人腳班底，用「實力評級」嚟計目前位居前列根本唔合理；故目前大軍戰績回落，未來不妨攞住嚟反，長線應有斬獲。
「錘仔幫」勝在有鬥心

雖然西布朗領隊莊拿斯奧臣死撐球隊仲係好弗，但演出回落卻係不爭事實，加上門神賓科士打同列治維都因傷缺陣，後防不穩之下，大軍分分鐘進退失據。「錘仔」韋斯咸雖有安祖卡路爾及迪亞美缺陣，但路蘭同麥克盧保仲喺度，加上球隊近期表現出打不死嘅鬥志，上場不敵利物浦好唔抵，只要「錘仔幫」保持鬥心，力足於西布朗身上取分。