噴射機難放「光輝」

猪拉多纳

希斯基反教練家嘈屋閉

當你搏晒命工作，老細完全唔欣賞，你會有咩感受？珀斯光輝今晚喺澳職主場對紐卡素噴射機，1.7倍主勝值得吼實。最近噴射機教練雲艾蒙怨球員攞黃牌同紅牌太多，搞到全隊士氣插水，連新加盟嘅希斯基都忍唔住帶頭反擊，亂晒龍要唔過。

（有線64及204周五晚6:45直播）
雲艾蒙怨球員攞牌多

現時噴射機以4勝1和5負位列中游，表現唔算曳，可惜教頭雲艾蒙唔收貨，仲公開話球員成日犯規。大佬呀！要知道噴射機本身後防唔掂，開季後10場已經失19球，假如佢哋可以叻到好似巴塞隆拿咁搓到對手頭暈，就唔使成日茅人啦，攞牌多都係搏命嘅表現啫，咁都鬧？依家噴射機突然被禁止踢茅波，可能更加易失波！

事實上，希斯基已睇唔過眼公開撐隊友，佢話冇人踢波會恨攞牌，又話澳職身體衝撞比英超更多，有時落腳慢半秒已出事，擺明同教頭打對台，加上噴射機有中場簡達路夫斯基同門將賓堅尼地養傷，人腳唔齊，對住跨季近13場主場9勝2和2負，又有後衞占美遜同特威迪踢完東亞盃外圍賽歸隊嘅珀斯光輝，明顯捧唔過。