車仔撻着踩油搶W

猪拉多纳

世冠盃4強戰，經驗贏晒蒙特雷

回勇嘅英超班霸車路士今晚首度亮相世冠盃，同中北美洲冠軍、墨西哥球隊蒙特雷爭入決賽。係人都知世冠盃係車仔臨時領隊賓尼迪斯嘅「續命丹」，爭標決心唔使懷疑，加上費托跟咗賓帥後翻生，今場對住實力低一班嘅蒙特雷係時候開殺戒，一於捧「讓球客勝」啦！（有線61及201、廣東體育周四晚6:30直播）

小弟近排聽到唔少球迷話賓尼迪斯冇料到，勝在一世夠運，有機會加盟大球會至有盃捧，好似兩年前咁，佢一接莫連奴手執教當年歐聯冠軍國米，就即刻捧走世冠盃，估唔到依家突然做咗車路士領隊，又有機會做多一次世界冠軍球會嘅主帥，好運到你唔信。係呀，世事就係咁巧合，賓尼迪斯叻就叻在識得把握機會，為自己省靚塊招牌，家陣又有呢啲可遇不可求嘅機會，佢又點會輕易錯過先？
費托跟賓帥信心返晒嚟

係，賓尼迪斯或者得唔到球迷歡心，但至少佢贏得「費托」信賴。近兩場比賽「費托」唔單止打破入球荒，仲梅開二度，狀態同信心都返晒嚟，今仗雖然有中場奧里奧爾羅美奧缺陣，但對車路士影響有限，賓帥仍然可以派豪華陣容出擊，自然係信心嘅保證啦！

蒙特雷上仗以3:1淘汰蔚山現代，表現唔錯，阿根廷翼鋒施薩迪加度仲好突出添，只可惜佢哋陣中有唔少年輕球員，大賽經驗嚴重不足，嚟到咁重要嘅比賽難免怯場，兩隊互片，咁梗係幾大都捧實力同經驗都贏晒嘅車路士啦！

頂占筍盤：車路士（讓球客勝）
世冠盃賽制

今場為4強戰，若法定時間內打成平手，則需加時作賽，再和就互射12碼決勝。