半場速決蒙特雷

猪拉多纳

繼尋晚我哋有線直播世冠盃四強艾阿里對哥連泰斯後，今晚會播另一場四強戰蒙特雷對車路士。蒙特雷個名比較陌生，呢間墨西哥球會近十場三勝四和三負，入球大細冇路捉，係乜葫蘆賣乜藥真係好難估計。車路士炒咗迪馬堤奧後搵賓尼迪斯頂上，佢上任後連續三場聯賽不勝，要到歐聯分組賽最後一場大勝洛斯查蘭特先翻生，上場聯賽作客擊敗新特蘭，連開兩口大盤，氣勢返晒嚟。
費托決心十足

好多人都話世冠盃係雞肋，但上場梅開二度嘅「王子」費蘭度托利斯就唔係咁睇，仲表示從未輕視過呢隻盃，會全力爭取成為世界冠軍。論近況，車路士的確鹹魚翻生，質素亦高對手一班，雖然冇對賽往績參考，但嚟到四強一戰搏盡，我睇好車仔半場已可砌低對手，一於揀晒半場大、半場勝同入球大！