史雲斯諾域治大激鬥

猪拉多纳

升班雙雄強勢對撼

今晚英超場史雲斯主場對諾域治，戲碼雖然唔可以同聽晚曼城撼曼聯相比，但都唔好低估呢場波嘅悅目性。兩隊都係上季升班馬，亦係近期走勢最好嘅英超隊伍，除咗保持多場不敗之外，期間仲贏過其他強隊，踢起上嚟分分鐘比曼市打吡更激烈，入球大可取。

（有線304及204台周六晚11時直播）

史雲斯近七場四勝三和不敗，當中包括主場逼和車路士，以及上星期作客爆大冷砌低阿仙奴，依家排第七。喺嗰場梅開二度嘅米捷已經累積咗十個聯賽入球，喺射手榜上同大球會前鋒尹佩斯、丹巴巴亞、蘇亞雷斯等睇齊，可見腳風都幾順吓。

史雲斯對強隊都博到入球，今場當然有能力破諾域治大門。佢哋喺主場都有啲威力o架，三勝四和一負，睇呢個成績，要佢哋今晚輸波全失三分難度好高。
主隊下半場入波多

另外就係史雲斯上、下半場嘅入球分布分別係七球同十六球，好明顯多數喺下半場先有進帳啦，買即場嘅朋友可以喺下半場出手，敲主隊入球。至於傷停方面，柏保路靴南迪斯仍然受傷，另外魯迪治呢場亦會缺陣。

諾域治儘管上季兩次對史雲斯贏波兼開入球大，但今次想再贏波唔易，因為佢哋到依家仍在爭取贏第一場作客勝仗，上季攻破史雲斯大門嘅安東尼派京頓同格蘭賀特開季至今分別得兩球同三球，表現不復上季勇。

好在「金絲雀」整體近況都唔差得過主隊，近九場不敗，更曾一球擊敗過我愛隊曼聯添，所以今場隨時有分落袋，人腳亦整齊過主隊，除咗門將魯迪繼續缺陣外，其他主力都可以披甲。
Wendy推介：入球大