車仔捉黑貓祭旗

猪拉多纳

世冠盃壯行色 費托磨劍

車路士歐聯出局，從好一方面睇，球隊得到解脫，可以集中精神踢好聯賽。今晚英超作客「黑貓」新特蘭，正好畀車路士用來祭旗，重新出發，安心出戰世冠盃。新特蘭過去15次撞「車」，輸咗14次，有地利都冇運行，簡簡單單要客勝。

（有線301及201台周六晚11時直播）

車仔上仗歐聯大炒洛斯查蘭特6比1，即使仍難逃出局厄運，但其實收穫豐富。首先，賓尼迪斯執教後終於開齋，而且係大勝，起碼暫時減少球迷反對聲音。其次，費蘭度托利斯打破入球荒，有助佢重拾信心，大大提升球隊破門能力。

另外，歐聯出局亦令車仔少一份心理壓力，專注聯賽爭標，或者成為球隊翻身嘅轉捩點。車仔踢完今場後，就要飛赴日本參加世冠盃，更希望贏波壯行色。
新特蘭撞「車」九死一生

新特蘭今季演出持續低迷，領隊奧尼爾似乎冇晒計，早前仲認低威，話只能為護級而戰，呢番說話令人洩氣。既然奧尼爾將目標定為護級，好可能揀波踢，全力喺實力接近嘅球隊身上搶分，遇上勁旅時只求輸少當贏。加上新特蘭往績上完全被車仔食住，以佢哋目前境況，更加難望打破宿命。