愛斯賓奴好難發「維」

猪拉多纳

兵疲力弱 換帥都冇用

西甲包艇嘅愛斯賓奴換上新帥後，今晚將會迎戰表現同樣未如理想嘅西維爾，「愛軍」早排對賽先吞完西維爾3蛋，雖然換咗帥，但短期內戰績難望大逆轉，平手盤都係捧1.86倍客勝啦！

（開賽時間：周六凌晨4:30）
西維爾有質素

愛斯賓奴有幾頹？開咧到依家只係贏過2場，家陣排榜尾成為降班大熱門，所以教頭普捷天奴無論幾得人心都好，早排經歷4連敗後都要被炒魷！家陣佢哋換上墨西哥主帥艾古爾領軍，中場域陀山齊士就話好似換咗「新晶片」咁，踢法更全面，但查實佢哋近6場先入得2球，上月尾仲因踢少個畀西維爾喺西盃大炒3:0，明顯兵疲力弱，艾古爾今次有排執喇！

西維爾嘅情況都唔好得去邊，但佢哋起碼有個拿傑迪錫識得入波，上場都係因為10人應戰先冇辦法追和華拉度列，今次對住衰到貼地嘅愛斯賓奴，有望「反底」踢番場好波。