漢堡開餐o趙賀芬咸

猪拉多纳

周五德甲再刮韓風

「德甲星期五」今晚由漢堡喺主場對賀芬咸，近日天寒地凍，當然係繼續撐孫弘民刮起嘅「韓風」，撐漢堡開1.95倍主W啦！特別係賀芬咸剛啱炒咗教練巴布，諗住翻兜德國國家隊助教漢斯弗利克，竟然又食檸檬，前程未卜睇落係降班格，要唔過喎！

（有線64及204周六凌晨3:30直播）
孫弘民騷哥利博跳槽

雖然漢堡有中場雲達華治、湯馬士連干同馬素贊臣養傷，南韓天才孫弘民又未好番晒，上周作客禾夫斯堡只係後備上陣，但佢復出都算好腳頭，帶挈漢堡最後以1:1賽和對手。事實上，最近孫弘民暗示過想趁冬季轉會市場跳槽去大球會，無論最後佢決定續約加人工留隊，抑或去名牌球會外闖，歇冬前都應該會把握機會騷哥利。

另方面，賀芬咸陣容同樣不整，除咗中場波利斯胡錫域同施巴斯坦魯迪未好番，長期入選德國國家隊嘅門將韋爾斯受傷，係佢哋成為德甲最不設防球隊、開季至今踢15場失36個聯賽入球嘅最攞命原因，家陣賀芬咸連輸4場失13球，全隊輸到冇晒信心同尊嚴，真係唔似突然可以翻身，恐怕要歇冬後至可以有起色。
賀芬咸亂龍冇人肯接手

或者巴布開季前簽咁多新球員，依然搞到賀芬咸衰到要護級，可能係抵炒嘅，但高層同樣唔抵幫，因為佢哋嘅新教練頭號目標、現時擔任德國助教嘅漢斯弗利克，收到風後已公開拒絕食回頭草，佢話冇打算喺2014年世盃前離開德國國家隊，冇興趣再執賀芬咸教鞭，隊波家陣要由青年軍教頭克拉馬頂硬上領軍，作客隨時輸多鑊甘。
博埋漢堡3倍「主主」

一般情況，炒教練都可以短暫激起球員鬥志，因為無論正選定後備，都希望表現最好一面畀新教頭睇嘛，不過賀芬咸係今季德甲防守最差球隊，淨係搵個青年軍教練頂檔，真係唔值得睇好，既然佢哋已經連續4場由半場輸到落尾，不妨吼實有3倍嘅「主主」，始終漢堡習慣上半場睇定嚟食，唔容易失波，只要把握1次機會領先，3分照計可以穩袋。
賀芬咸換邊前例輸波

‧漢堡連續10場開半場入球細。

‧漢堡今季主場得4勝3負冇和局。

‧賀芬咸近8場有7場開入球大。

‧賀芬咸連續4場半場落後。