迅速米達列斯「垃圾時間」大解放

猪拉多纳

又到Macot最鍾意研究嘅歐霸盃賽日，今晚重心出擊場次係Ｋ組奧地利維也納迅速對烏克蘭米達列斯，今場形勢上係例行公事，兩支崇尚進攻嘅球隊喺冇壓力下輕裝較量，預期係一場入球騷，1.68倍入球大係不二之選。

（周五凌晨4時05分開賽）
迅速防線48隊中最差

維也納迅速喺今屆歐霸盃5戰皆北，除咗係篤定出局嘅零分部隊外，共失14球仲係48支參加歐霸盃球隊中失波最多嘅一隊，防線水皮令佢哋喺水準甚低嘅奧地利甲組聯賽都經常遇上麻煩，嚟到歐霸盃咁高級別嘅比賽當然要出醜，但佢哋並冇刻意改善呢方面問題，反而索性以攻代守，佢哋至今喺歐霸同奧甲每場波嘅平均總入球都有3.4個，今場比賽雖然移師安斯夏普球場上演，但都係維也納境內，佢哋好希望喺今屆歐霸舞台嘅告別演出攞番個彩，安慰主場球迷，今仗必然搶攻爭勝。

米達列斯啱啱相反，上輪主場贏咗利華古遜後，已穩奪首名出線資格，今場冇晒包袱，呢班波入球能力好強，雖然防線唔算曳，但Macot相信嚟到呢啲「垃圾時間」，佢哋唔會太介意畀主隊入吓波，兩軍將會大踢開放足球，入波點會少？
Macot推介：

維也納迅速大 ★★★★★

特拉維夫夏普爾勝 ★★★

費倫巴治大 ★★★