聖保羅客打冇牙老虎

猪拉多纳

歐聯今晚激戰連場，另邊廂嘅南美球會盃仲激，聽朝會由阿根廷嘅堤格雷，會同巴西聖保羅喺決賽首回合交鋒。聖保羅已經攞到來屆自由盃入場券，如果捧埋南球盃就Perfect，佢哋剛啱喺巴甲煞科戰半力出擊都照數哥連泰斯，勇猛成咁使乜怕得番「半個主場」嘅堤格雷吖？作客讓平半捧上盤。

（有線61及201周四早上7:50直播）

聖保羅喺巴甲以第4名衝線，教練法蘭高為留力聽朝場波，出B隊都照贏哥連泰斯3:1，連養傷多時嘅中場甘素，都重拾狀態交出靚助攻，聽朝聯同復任正選嘅首席射手路爾斯法比安奴及中場盧卡斯洛迪古斯，呢個攻擊鐵三角真係唔講得笑。再講，今個月15號係聖保羅創會77周年，肯定唔想畀堤格雷搞寸個Party嘅！
堤格雷要借用小保加主場

根據南美足協條例，決賽場地起碼要有4萬座位，堤格雷個維多利亞球場並唔符合資格，直至前日先問小保加借用拿邦保拿利球場，個場係就係可以坐到4.9萬人，不過都唔係自己主場，即刻變成冇牙老虎！堤格雷今季喺阿甲贏得1場咁大把，南球盃4強亦只係靠作客入球優惠先驚險淘汰哥倫比亞球隊米倫拿列奧，歷史性殺入南球盃決賽算係超額完成，今鋪有「半個主場」都唔睇好。
南球盃賽制：

採主客兩回合淘汰制，今輪為決賽首回合，不設作客入球優惠，若總比數相同，將於次回合後加時作賽，再和就互射12碼決勝。