曼聯繼續hea踢益晒克盧日

猪拉多纳

歐聯肯定晉級加上有「曼市打吡」跟尾，曼聯肯定收起主力兼hea踢！H組賽事曼聯主場對羅馬尼亞大軍克盧日，「傷愈孖寶」菲爾鍾斯同基斯史摩寧將打正選，尹佩斯或連後備都冇，讓波唔抵玩，拿仁捧「讓球客勝」！

（有線61及201台周四凌晨3時45分直播）
後備上陣 留力鬥曼城

曼聯贏晒首四輪分組賽後，已肯定首名出線，上輪作客加拉塔沙雷派後備敷衍下，最後輸0比1，戰果好合理。嚟緊英超曼聯將作客死敵曼城，勝負或成他日爭標關鍵，所以今場領隊費格遜必定收起主力，唔係無喇喇傷咁幾件就喊都無謂。官方消息指菲爾鍾斯及基斯史摩寧兩位剛傷愈後防，將聯同小將阿歷山大畢拿組成防線，狀態嚴重不足下，失波絕非奇事。

克盧日目前同加拉塔沙雷同得7分，要爭小組次名仲有價講；而首循環主場對紅魔鬼，若非尹佩斯梅開二度，克盧日未必會輸。今次球隊戰意高昂，面對「二線魔兵」有力不敗，受讓抵玩。另一戰布拉加主場對加拉塔沙雷，布軍已出局，但加軍作客讓波難靠，今仗變數太多，不宜沾手。