阿仙奴「和」頭酒敬fans

猪拉多纳

夫添征希臘博首名

歐聯分組賽今明兩晚煞科，好幾組出線形勢已定，唔少球隊戰意成疑，包括我哋球彩台直播嘅B組賽事奧林比亞高斯主場對阿仙奴。奧軍肯定排小組第三名轉戰歐霸，而阿仙奴亦肯定晉級，問題係會唔會博首名，領隊雲格表示會帶主力作客希臘，更何況阿仙奴後備力量唔失禮，呢場和味濃。

（有線64及204台周三凌晨3時45分直播）
奧林比亞高斯往績硬淨

阿仙奴剛於聯賽主場吞史雲斯兩蛋，班fans賽前更示威反對班主管理不善，球隊內憂外患積聚太多問題，加上周末英超要對西布朗，今場一班主力雖然有去希臘，但就未必由最強11個踢正選。

奧林比亞高斯首循環作客阿仙奴輸1比3，但呢隊「希臘一哥」喺主場一向有威力，近八場主場全勝，近年喺歐洲賽亦曾兩次主場贏過阿仙奴，權衡兩軍利弊，點計都係五五波，一於博和波。另一場蒙彼利埃主場對史浩克04，蒙軍篤定包尾，前兩次主場分組賽亦全敗，相信一向重視歐聯嘅史浩克04可望贏波取得首名出線。

大家仲記唔記得我同大家透露過，今季初我同幾位同事打賭阿仙奴排名會低於第七，輸咗嘅要請對方去五星酒店食自助餐？依家「兵工廠」排緊第十，唔知呢餐會係我請定係有人找數呢？