喜鵲內亂 啄唔入韋根

猪拉多纳

丹巴巴亞扭計加1倍人工

今晚「英超星期一」紐卡素喺主場對韋根，隨時繼續衰。紐卡素領隊柏杜承認受到降班威脅，點知射手丹巴巴亞唔識驚仲要挾加1倍人工，搞到同高層擘面，相反韋根門將艾哈比斯孭晒鑊都有領隊馬天尼斯撐，贏戰意捧1.8倍「讓球客勝」！（有線200、300及廣東體育周二凌晨4:00直播）

其實兩隊陣容真係殘鬥殘，紐記缺陣球員以中場卡比耶、翼鋒賓艾化同後衞史提芬泰萊養傷影響最大，兼且有後衞白治停賽，都咪話唔頭痕。至於韋根就有至少8個一隊成員因傷避戰，包括前鋒古沙特、中場賓屈臣、翼鋒宮市亮同後衞艾卡拉斯全部唔踢得，所以冇話邊隊着數啲。
同高層擘面威脅走人

不過咁，由於「喜鵲」紐卡素射手柏比斯施斯今季狀態插水，入球責任基本上落晒喺佢塞內加爾鄉里丹巴巴亞身上，弊在現時有4萬鎊周薪嘅丹巴巴亞，要求球會加薪至8萬鎊，但紐記高層只肯加1萬鎊，搞到丹巴巴亞鬼殺咁嘈嗌走人，同班高層擘晒面，因為合約訂明任何球會出得起700萬鎊（約8,687萬港元），就可以將佢買走。

要知道紐卡素近7場得3和4負，對住修咸頓都要輸，家陣食胡球員仲要扭計，真係唔似突然彈得番起。另一方面，韋根現時同紐記同分，但領隊馬天尼斯護級經驗豐富，呢場佢應該好明白要點部署，佢更加喺賽前公開維護近期連環出醜嘅門將艾哈比斯，咁有承擔，班球員梗係為佢搏命啦！
紐記連續7場不勝

‧紐記連盃賽連續7場不勝。

‧紐記連盃賽連續8場都有失球。

‧韋根英超作客6場只入4球。

‧韋根近5場聯賽作客輸4場。