貝迪斯心雄受讓筍

猪拉多纳

拉科瀕破產頹爆

今晚西甲戲碼雖然麻麻，但其中拉科魯尼亞主場對貝迪斯卻非常好路。主隊唔單止近況欠佳，佢哋又爆出財困消息，搞到班球員冇晒心機。相反，貝迪斯上輪勇挫皇馬，上周中又喺西盃擊敗華拉度列成功晉級，士氣高漲，此消彼長下，貝軍作客有權乘勝追擊，有得受讓下「讓球客勝」屬穩陣之選。（now 632周一凌晨零時直播）

今季重返甲組嘅拉科，儘管喺場上鬥心十足，奈何實力有限，尤其面對同級球隊時，總係老鼠拉龜冇嚟火力，近8仗僅得1勝之餘，只係搶得7分，難怪喺下游掙扎喇。

除咗成績麻麻外，西媒更爆出拉科目前負債達3400萬歐元，據報高層已找債主做債務重組，甚至有破產危機添，使陣內愁雲慘霧，今仗仲有馬真拿、薛卡斯度、梳爾費南迪斯、沙洛馬奧繼續因傷倦勤，有乜本錢讓波呀？
拉科繼續殘陣出擊

另一邊廂，貝迪斯可謂氣勢如虹，上輪聯賽靠好波之人比納特一箭定江山擊敗皇馬，並且喺上周中西盃次回合收復失地，以總比數3比1淘汰華拉度列晉級，依家貝軍心雄，同埋佢哋快速反擊厲害，作客對態沉兼防守曳嘅拉科，至少能全身而退，「讓球客勝」勝在穩陣，有1.73倍咪嫌少。
馬略卡薩拉戈薩吼角球細

講到特別項目，就不得不提今晚馬略卡對薩拉戈薩，大家都知西甲球隊常踢地面進攻，一向角球唔多，咁蹺呢兩隊於防守方面異常硬淨，解圍清脆利落，預計悶鬥悶下，角球細盤穩開。另外德甲禾夫斯堡對漢堡，前者於鋒線重新起用巴斯杜斯，呢位荷蘭高大中鋒擅於高空轟炸，經常搏到角球。漢堡教練芬克近期改踢簡單直接的高波進攻，前鋒魯迪尼夫斯及馬古斯貝治均屬擅頂之人，睇番紀錄，兩軍近四場聯賽，全部都開出角球大，既然咁旺，不如追多鋪。