黑貓穩守突擊玩雀

猪拉多纳

英超獨腳戲上演「貓」捕「雀」，弗爆「金絲雀」諾域治主場對「黑貓」新特蘭，單睇近績「金絲雀」冇得彈，不過呢班波擅守不擅攻，今次撞着硬淨「黑貓」難贏，讓波唔抵玩，要「讓球客勝」！

（有線300及200台周一凌晨零時直播）
諾域治讓波現形

自從10月初作客車路士大敗後，諾域治突然上身，已經保持八戰不敗，淨計主場四連勝，贏過阿仙奴、熱刺同曼聯等強手，弗到你唔信！「金絲雀」後防忽然升呢，近排守得好穩，班兵不斷喺中後場跑動逼搶，前面靠大舊中鋒格蘭荷特停波，再等其他隊友冚上嚟打反擊，成功將勤補拙，利用呢套戰術連恰幾支強隊。不過諾域治今次對住新特蘭形勢唔同晒，佢哋欠缺強攻本錢，要破關難度大好多。

睇近況新特蘭同對手完全冇得揮，佢哋近六戰輸四場，打出開季以來最曳走勢，明顯陷入低潮。「黑貓」前面太倚重射手史提芬費查，進攻瓣數唔多，呢個死症已經講到悶，暫時仲未有得醫。不過呢班波中後場破壞力極強，近期唯一勝仗係作客贏富咸，大軍鋒力疲弱，喺客場專注防守再做反擊更適合佢哋發揮，今戰實行以其人之道還治其人之身，有力頂住「金絲雀」，「讓球客勝」捧得過！