紅軍變出禍難炒修咸頓

猪拉多纳

依家嘅利物浦已經唔係上世紀80年代嗰隊戰績輝煌嘅「紅軍」，近幾年甚至淪落到人見人欺嘅地步，所以輸畀熱刺一啲都唔意外，即使返到晏菲路對住修咸頓，亦只望有分落袋咪諗住大炒。

利物浦自從「降呢」後，家陣競爭目標只係希望排名唔好低過同巿宿敵愛華頓，昔日霸氣冇晒！雖然「用人不疑，疑人不用」，奈何領隊羅渣士巧婦難為無米炊，因為陣中大部分球員都係上手杜格利殊留低，所以佢好坦白同人講依家嘅陣容並唔係佢嘅。

羅渣士咁直接即大失民心，大家亦唔會盡力幫佢搏甩髀，至弊佢又夾硬要球員跟足佢嗰套戰術部署，首當其衝係隊長謝拉特，身邊已經冇咗啲世界級球員，仲要佢減少長傳發動進攻，做多啲地面交波走位，結果愈變愈衰，謝拉特對熱刺竟然全場冇一次成功傳波，完全冇幫隊友製造到埋門機會。

修咸頓有自知之明，改變季初好睇唔好食嘅攻勢足球，堵塞咗防守漏洞，戰績當堂冒升，近4輪不敗肯定會做場好戲畀「紅軍」睇。