熱刺踩場「大」報復

猪拉多纳

丹普西一肚火倒戈富咸

今晚英超將會有兩場倫敦打吡，除咗頭場韋斯咸對車路士之外，仲有夜啲嘅富咸主場對熱刺，焦點係倒戈嘅熱刺球員丹普西同迪比利。丹普西今年夏季轉會時，同富咸關係開始惡化，佢表示一直得唔到富咸嘅尊重，唔單只實力冇被認同過，連球會季前去瑞士集訓都冇預佢，於是一怒之下決意轉會，所以兩位今晚一旦有機會出場，一定會搏盡，畀番啲顏色舊東家睇，呢場入球大係首選。

（有線302及202台周六晚11時直播）

小妹認為呢場倫敦打吡可以用「非一般」嚟形容，熱刺近態比主隊富咸更好，近兩場喺白鹿徑主場擊敗過韋斯咸同利物浦。加里夫巴利狀態不俗，有佢快放攻力有保證，此外熱刺當然繼續派首席射手迪科爾上陣。不過熱刺最令人擔心嘅仍然係後防，順手拈來嘅例子就係幾個禮拜前，佢哋作客阿仙奴可以領先一球，但係最終輸二比五，後防弱點盡現，今季喺其餘兩場倫敦打吡對韋斯咸同埋車路士，熱刺亦有失波，呢兩場亦都係開出入球大。
貝碧托弗 祖爾激讚

富咸無疑近況有啲回落，近六場比賽未贏過，但上場作客車路士表現對辦，差啲重可以由一分變到三分添！富咸今季聯賽四場勝仗之中，有三場係於主場取得，所以今晚並唔係無贏面o架，領隊祖爾特別激讚陣中射手貝碧托夫有態，而另一箭頭柏歷預計都會得到正選機會，攻力唔曳。

莊家開個盤口始終都係睇好熱刺，即使富咸主場有幾大威力，都仍然有得受讓，不過熱刺後防真係極度不穩，與其買上盤震過貓王，不如投X入球大重好過啦。
Wendy推介：大