米倫劈雷捧「主勝」

猪拉多纳

高原夠惡

南美球會盃4強次回合終極戰聽朝上演，米倫拿列奧喺主場對堤格雷，不妨熱捧「讓球主勝」。講到底米倫拿列奧喺哥倫比亞首都波哥大高原主場出戰，屬於贏波信心保證，阿根廷球隊堤格雷喺聯賽沉淪，唔似惡得出樣。

（有線61及201周五早上8:15直播）

雖然波哥大冇玻利維亞嘅高原主場咁攞命，但其實海拔2,640米，正常人去到都好難跑得郁。事實上，今屆米倫拿列奧喺南球盃主場有3勝1和，先後打沉過英特加斯、彭美拉斯同甘美奧，而且每場至少淨勝兩球，首回合0:0今戰返主場出線機會好大。
堤格雷近況曳輸卡士

既然巴甲前列分子甘美奧去到米倫拿列奧主場，都要以1:3慘敗，喺阿甲排尾2兼近況曳得多嘅堤格雷，仲有派奧因為車禍長抖，即使有中場拉美路里安坐完波監都好難夠砌！再講米倫拿列奧射手雲泰利亞，曾經以借用身份効力山度士，卡士唔弱，暫時佢喺今屆賽事攻入5球，好有機會登上神射手寶座，梗係要鍊盡省多幾粒博轉會跳槽啦！

首回合：米客和0:0
南球盃賽制

採主客兩回合制，今輪為4強次回合。兩回合計打和將計算作客入球優惠，未分勝負則於次回合法定時間後以互射12碼決勝。