窮拖肥爆富廠仔

猪拉多纳

莫耶斯夠料鍊贏大花筒雲格

英超快車上演「窮教頭對富教授」！愛華頓今晚主場對阿仙奴平手抵撐！雖然近年拖肥糖深陷財困，但領隊莫耶斯識慳又有料，唔適宜同佢作對。相反兵工廠領隊雲格被踢爆原來洗腳唔抹腳，作客咪睇高！

（有線201及301周四凌晨3:45直播）
愛華頓費蘭尼復出

如果話愛華頓冇咗莫耶斯會冧檔甚至降班，相信冇咩人會反對。事實上，比起其他中下游球隊佢哋財力弱過藥煲，今年用500萬鎊買射手謝拉域已經係近年最大手筆，最近莫耶斯打算將爆炸頭費蘭尼以3,000萬鎊高價賣到車路士，窮得嚟認真有腦。據講莫耶斯有意向紐約紅牛借用番卡希爾，兼平價收購布魯日嘅奧科爾補充中場實力，咁識得理財，開咧戰主場又贏過曼聯，證明有料到！況且今場仲有費蘭尼坐完波監復出，今季佢連入波都有埋隨時又做英雄！
阿仙奴高薪冗員多

另一方面，雲格表面上成日慳住阿仙奴荷包，但根據財政報告，原來上季兵工廠球員薪酬支出要1.43億鎊，平均每星期出糧比死對頭熱刺多100萬鎊，最後只不過多對手1分，證明雲格簽埋好多高薪低能球員，例如留住查馬克同艾沙維，就唔知為乜！

最近又有報道話，兵工廠想用1,000萬鎊，收購畀利物浦當左閘用嘅達寧，唔知笑教授老懵懂定傻咗。但無論如何，即使阿仙奴上場作客維拉互交白卷嘅比賽，收起幾件正選做後備留力，佢哋近5場作客始終得聯賽盃加時險勝雷丁，平手2.1倍高水似引人落疊多啲。
拖肥連開4場半場細

‧愛華頓近5次主場對阿仙奴得1和4負。

‧拖肥糖連續4場半場開出入球細。

‧阿仙奴近5場有2次半場領先、3次打和。

‧兵工廠連續7場入波後上場首次冇波入。
廠仔後防遊魂 博拖肥先入波

睇衰阿仙奴，因為佢哋今季後防表現遊魂，對上7場喪失13球，就連過去表現可靠嘅隊長華美倫，都突然不斷蝦碌。相反愛華頓向來守字行頭，既然兵工廠近7場有3次先失波，只要拖肥糖保持水準，絕對有條件先入波，「第一隊入球」有1.83倍諗得過。當然，射手謝拉域係首名入球熱門人選啦！