南球盃聖保羅晒冷攞威

猪拉多纳

南美球會盃四強次回合，巴甲球隊聖保羅主場對智利球隊天主教大學。首回合兩隊打成一比一平手，如今輪到聖保羅有主場出擊，成個形勢會唔同晒。其實球迷都知巴西及阿根廷球隊於南美區超晒班，尤其主場威力特別強勁，相信今場晒冷可以輕鬆解決天主教大學，「讓球主勝」值得捧場。

（有線61及201周四早上7時50分直播）
智利天主教大學唔夠砌

聖保羅早就被認定為今屆南球盃奪標大熱，主要原因係陣中有唔少星級球員。除門將羅渣里奧之外，仲有前西維爾前鋒路爾斯法比安奴以及前阿仙奴中場丹尼遜。後兩者受過歐洲球隊高壓逼性訓練，返回南美球壇自然有優勢。另外要留意聖保羅喺八強所淘汰嘅球隊，同樣來自智利嘅名牌智利大學，今次踢埋天主教大學出局都唔出奇。