富咸熟路「半和＋細」

猪拉多纳

英超近排興換領隊，好似昆士柏流浪炒曉士請夏利列納，車路士就炒迪馬堤奧，搵賓尼迪斯「上車」。可惜，賓帥領軍第一場主場對曼城都只係同對方互交白卷，兩隊同時失分梗唔係好事。

「藍軍」依家排名跌到第四，但賓尼迪斯自我安慰話能夠保持不失球，都算係達到目標。其實佢近年運氣都係麻麻，之前以為接掌國際米蘭諗住執到支好籌，佢亦都喺六個月內幫球會奪得兩座冠軍獎盃，點知都係保唔住國米份工，炒魷之後仲要做埋球迷同媒體笑柄。依家去到車仔做唔到一上工即贏，惟有靠今晚對富咸開齋喇！
近５對戰全細

由於賓帥喺利物浦時已經激嬲咗班「藍戰士」擁躉，當日對曼城場波畀班車迷狂噓，有球迷高舉「賓尼迪斯滾出去」標語，仲不斷歌頌迪馬堤奧。事隔幾日，今晚再於史丹福橋球場迎戰富咸，牌面上車仔當然高啲，加上上次屠「城」失敗，今晚唔可以再失威，一定搏盡。作客嘅富咸即使有貝碧托夫坐鎮，都似乎幫唔到幾多，球隊連續五場贏唔到，仲失咗十二球。作客成績更差，今季聯賽七場作客只贏得一場，對手仲要係韋根咋！

不過計往績，近年富咸又係「恰車格」，近五次對賽都開入球細，當中四次和波，三次半場和。若果以富咸今季表現睇，呢場要贏出機會唔大，始終睇好車仔會贏，不過富咸就應該頂得住半場和波，加上近五次交手全部開細，都可以試試。