費利拿弗爆追殺「里」

猪拉多纳

今晚有成三十幾場波，不過阿King就睇中一場葡超獨腳戲，費利拿主場對住馬里迪莫，兩軍近況可謂差天共地，前者氣勢如虹殺入前五，後者則受歐霸拖累，成績直線下滑，既然咁好路，一於捧主勝。

（周三凌晨4時15分開賽）

費利拿近期成績真係炙手可熱，近8仗未輸過之餘只失兩粒，當中仲贏足6場，防線固若金湯，而施些路、安頓尼斯同域陀艾曼紐又腳風轉順，係費軍穩步上揚的最大功臣。相反馬里迪莫由於板櫈深度不足，今季又要出戰歐霸，球員明顯未能承受一周雙賽的壓力，近8仗贏得1場，最慘係球員疲於奔命，搞到聯賽同歐霸兩頭唔到岸，短期內難望復甦，作客難敵當頭起的費利拿。
恩華尼斯受讓揀得過

蘇超方面，恩華尼斯上仗作客勇挫班霸些路迪，軍心大振，其實恩軍作客已經4連勝，就算作客次席的鴨巴甸都冇有怕，受讓之下梗係揀「讓球客勝」。最後蘇超升班馬羅斯郡為了護級，直頭係有前冇後豁出去，主場對聖美倫照攻可也，大盤有分頭值博。