艾迪巴約豬噏當秘笈

猪拉多纳

今期《最佳男主角》請來演技浮誇到爆嘅多哥射手艾迪巴約，呢位球星喺國家隊經歷槍擊事件後神神化化，上周倒戈鬥阿仙奴領紅被逐，佢竟然話係好事，究竟佢諗緊乜o架？

艾迪巴約兩年前喺非國盃遭遇槍擊事件，最終執番條命，之後無論面對任何事情都保持樂觀態度，講起熱刺近期戰績唔掂，佢即時大發偉倫：「我哋一定要改善囉，唔改善之後就有排煩，但有時啲嘢唔到你控制，我班老友成日叫我正面啲，我唔會再諗埋啲衰嘢，如果情況更壞，我哋晨早死咗啦，啱唔啱先！」
講嘢懶正面　提傳聞扯火

艾迪巴約上周倒戈鬥阿仙奴，成為各界焦點，最終踢咗唔夠廿分鐘入完波就被逐，佢又好正面咁話：「嗰日係我職業生涯其中一個災難日，我會向好嗰方面諗，如果我踢足九十分鐘跟住受傷抖半年，咁點算先？依家我只係休息吓，我會用正面態度去睇呢件事囉！」相信熱刺教頭保亞斯同班球迷冇佢咁正面囉。

為咗測試艾迪巴約係咪真係睇得咁開，我哋決定要佢講吓熱刺有關想踢走佢嘅傳聞，佢即時有啲火咁回應：「嗱，你呢個問題有啲問題，我啱啱同球會簽咗四年約，依家同屋企人喺倫敦都好開心，之前我搏晒命爭取呢份合約，唔會自己走囉，若果球會要賣我，我都冇得揀。」咦，似乎啲傳聞並非空穴來風喎。

艾迪巴約有追開《最佳男主角》，去到訪問尾聲自動波分享秘密：「我其實好鍾意跳舞，又好鍾意做戲，如果唔踢波可能入咗娛樂圈！」呢位球星場外識跳草裙舞，場內又識扮嘢，喺球圈一樣可以盡展所長。